Encontro con ROSA MÉNDEZ. AfundaciónTV

AfundaciónTV continúa coa programación do ciclo de coloquios «ConCiencia sostible», en colaboración coa revista galega de divulgación científica GCiencia, coa conferencia de Rosa Méndez García, profesora da Área de Didáctica e Organización Escolar da Universidade da Coruña. A súa intervención, titulada «A educación para a cidadanía global no sistema educativo: algunhas claves para a acción», abordará parte dos seus intereses de investigación: o currículo e o proceso de ensino-aprendizaxe, centrándose no estudo da educación para o desenvolvemento e a cidadanía global, reivindicando a presenza deste enfoque nas políticas públicas de educación. Na charla centrarase nas claves do ODS número 4 (unha educación inclusiva, equitativa e de calidade, co obxectivo de promover oportunidades de aprendizaxe durante toda a vida para toda a sociedade), cun enfoque cara á importancia da educación para a cidadanía global, e do traballo do grupo de investigación ECIGAL.

 
Este ciclo ConCiencia sostible enmárcase no compromiso de ABANCA e Afundación a prol dun modelo sostible que permita contribuír ao equilibrio económico, social e ambiental do seu contorno. Para iso, e co propósito de mellorar a sociedade e fomentar o desenvolvemento integral de todos os que a integramos, coas propostas enmarcadas no principio de sostibilidade de Afundación poderase aprender e gozar con iniciativas científicas de relevancia divulgativa e xeral. Desde conferencias, ata exposicións fotográficas nas que a beleza do noso contorno recóllese en todo o seu esplendor, ou unha recreación interactiva do aumento do nivel do mar a futuro a partir dos datos máis actualizados ao respecto, sen esquecer as imprescindibles accións de voluntariado de limpeza de praias e fondos mariños fundamentais para a participación activa no coidado do noso medio ambiente.