Exposición COMPROMISO COA ARTE Coleccións ABANCA e Fundación Bancaja. A Coruña
COMPROMISO COA ARTE. Coleccións ABANCA e Fundación Bancaja é a nova exposición que chega este outubro á Sede Afundación A Coruña. Un total de 77 obras das coleccións de ABANCA e Fundación Bancaja amosan un repertorio artístico excelente, desde as vangardas históricas, con traballos de Picasso, Kandinski ou Georges Braque, ata as formas da pintura contemporánea. Visítaa desde o 14 de outubro e ata o 31 de xaneiro de 2026 na cidade herculina.
Comisario | Fernando Castro Flórez
VISITAS GUIADAS
para público xeral
xoves 8, 15, 22 e 29 XAN | 19.00 h
Colabora co noso proxecto solidario CULTURA POR ALIMENTOS, traendo unha doazón de produtos non perecedoiros para axudar os bancos de alimentos locais. Infórmate!
Compromiso coa arte é unha exposición que reúne obras destacadas das coleccións de ABANCA e da Fundación Bancaja, dúas institucións cunha longa traxectoria de apoio á arte e á cultura. A través dun percorrido que abrangue desde as vangardas históricas ata a creación contemporánea, a mostra convida a mergullarse nun diálogo entre xeracións, estilos e sensibilidades. Con pezas de referentes como Picasso, Kandinski, Braque, Scully, Equipo Crónica ou Juan Genovés, a exposición ofrece unha ollada diversa e de gran calidade que se afasta do convencional.
Lonxe dunha visión historicista, as obras seleccionadas preséntanse como espazos abertos á interpretación, evocando emocións, ideas e reflexións. Unha das salas propón unha suxestiva “navegación” artística inspirada nas atmosferas mariñas de Urbano Lugrís, mentres outras exploran paisaxes naturais e urbanas como símbolos de resistencia e esperanza.
En tempos marcados pola saturación visual e pola superficialidade, esta exposición aposta pola arte como fiestra ao fermoso, ao profundo e ao transformador. Así, ABANCA e Fundación Bancaja renovan o seu compromiso coa democratización cultural, achegando ao público obras que, máis alá do seu valor estético, nos convidan a imaxinar novos futuros.
Aproveita para visitares a nosa axenda web e infórmate de todas as propostas culturais que che ofrecemos ao longo do mes ou entra na nosa billeteira online Ataquilla.com para máis actividades escénicas.