Encontro virtual A VIDA LENTA, con OLGA NOVO e XOANA ALMAR e conducido por Aser Álvarez en AfundaciónTV
Neste mes de maio tes uns encontros virtuais en Afundación TV co gallo da mostra A VIDA LENTA [+ INFO] e guiados polo seu coordinador, Aser Álvarez.
Desta volta, acompañarannos:
OLGA NOVO e XOANA ALMAR | 26 MAI | 19.00 h
Desde as súas casas, as dúas mulleres falarán sobre as súas necesidades de conectar coa aldea.
OLGA NOVO. Premio Nacional de Poesía 2020. Poeta, ensaísta e profesora, é unha voz moi particular que mestura maxistralmente o universo popular e rural (sen dúbida, eixo do seu discurso e creación), con referencias cultas. A muller labrega, as raíces rurais e a perda de poboación nas aldeas galegas son temas chaves para entender a autora.
XOANA ALMAR. Licenciada en Economía pola Universidade de Santiago de Compostela e en Antropoloxía Social e Cultural pola Universidade de Granada. Dedícase á pintura desde o 2008, aínda que é algo que leva facendo desde sempre. No 2013 fundou, canda Miguel Peralta e Raquel Doallo, a Cooperativa Cestola, unha cooperativa de traballo asociado que abarca a pintura, a ilustración o muralismo e a formación na economía social. Desde o 2020 a actividade mural é a principal, con grande presenza no ámbito rural e en pequenas vilas. Os murais de Cestola teñen un carácter moi recoñecíbel, onde abondan as mulleres labregas, as cestas e a natureza; todo trasladado a un universo propio marcado polo rural.
TAMÉN 14 MAIO | ÓLIVER LAXE | 18.00 h
A VIDA LENTA [+ INFO] é un proxecto que, a través da exposición presencial e das actividades paralelas en liña, pretende divulgar diferentes visións do rural que nos axuden a entendelo desde parámetros contemporáneos para enriquecer e actualizar o discurso, iconografía e expectativas que temos sobre o asunto.
O rural acostuma asociarse, a miúdo univocamente, cos valores da tradición, da humildade, do esforzo e da cultura popular folclórica. A forza desta proposta reside en aprendermos que o rural tamén significa inspiración contemporánea, vangarda, compromiso e fervedoiro de creatividade.
O fío conductor destes 2 faladoiros é o rural, comprobando que a proposta actual baixo este lema é variadísma e denota unha presenza actual crecente, que recolleremos con inspiradores representantes de diferentes ámbitos: cinema, poesía e muralismo.
Desde Afundación temos a convicción de que divulgar desde o compromiso coa diversidade é o único xeito de podermos entender o mundo, cada vez máis plural e preciso de maior respecto e empatía. Estes encontros ilustran a diversidade rural, creativa e cultural que atopamos no país.
1__large.jpg)
