Ciclo de cinema DIRECTORES ITALIANOS na Coruña
SEDE AFUNDACIÓN A CORUÑA | 8 a 29 NOV 2021
Neste novo ciclo presentamos unha selección de filmes dirixidos por tres destacados directores italianos. Estas catro películas, que tratan temas tan diversos como o humor, a ironía, a paixón pola arte, a intriga ou o amor, compoñen unha mostra pequena aínda que representativa das tendencias do cine italiano actual.
Imprescindible reserva previa no 981 185 060 ou na sede de Afundación, Cantón Grande, 8.
Este ciclo enmárcase en CULTURA POR ALIMENTOS, unha iniciativa de Afundación en prol de FESBAL (Federación Española de Bancos de Alimentos). O acceso a cada unha das sesións será a cambio da entrega dalgún alimento non perecedoiro, que irá destinado ao banco de alimentos local.
CALENDARIO
8 novembro | 19.00 h | Call me by your name
Luca Guadagnino. Italia, 2017
127 min
NRM 12
15 novembro | 19.00 h | La grande bellezza (La belleza)
Paolo Sorrentino. Italia, 2013
136 min
NRM 12
22 novembro | 19.00 h | La migliore offerta (La mejor oferta)
Giuseppe Tornatore. Italia, 2013
131 min
NRM 7
29 novembro | 19.00 h | La giovinezza (La juventud)
Paolo Sorrentino. Italia, 2015
119 min
NRM 12
Todos os filmes proxectaranse en versión orixinal subtitulada en español.
FILMES
Call me by your name
Luca Guadagnino | Italia | 2017 | 127 min | NRM 12
Elio pasa o verán de 1983 coa súa familia nunha vila italiana. Ten 17 anos e ocupa o tempo a ler, escoitar música ou nadar. Un día chega Oliver, axudante de seu pai, un mozo encantador e atractivo. Logo dun arranque frío, Elio e Oliver comezan a sentir unha atracción mutua que se irá volvendo cada vez máis intensa.
La grande bellezza (La belleza)
Paolo Sorrentino | Italia | 2013 | 136 min | NRM 12
Transcorre o verán en Roma. Arredor de Jep, un escritor dominado pola indolencia e o fastío, desfila unha serie de personaxes tan poderosos coma insubstanciais. Nobres decadentes, políticos, criminais de altos voos, xornalistas, actores, prelados e intelectuais asisten a festas en luxosos palacios e van tecendo unha trama de relacións inconsistentes.
La migliore offerta (La mejor oferta)
Giuseppe Tornatore | Italia | 2013 | 131 min | NRM 7
Virgil Oldman, un experto en arte, é un home solitario e excéntrico, alleo a toda emoción ou sentimento. A súa vida muda cando a bela e misteriosa Claire lle encomenda a taxación das obras de arte que herdou de seus pais. Claire padece unha rara doenza psicolóxica que a mantén illada do mundo.
La giovinezza (La juventud)
Paolo Sorrentino | Italia | 2015 | 119 min | NRM 12
Fred é un grande director de orquestra que renunciou tempo atrás á súa carreira. Un día recibe a visita dun emisario da raíña Isabel, que quere convencelo para que dirixa un concerto no palacio de Buckingham co gallo do aniversario do príncipe Felipe.
