Charla informativa: Aprende a cultivar un horto e horticultura ecolóxica - Espazo +60 Lugo

O Espazo +60 Afundación de Lugo organiza unha nova actividade de educación ambiental para aprender a cultivar un horto e afondar na horticultura ecolóxica. Ademais, ofrece ás persoas socias do centro a posibilidade de participar no proxecto de “Hortos Urbanos” da Deputación de Lugo e do Concello de Lugo a través do apadriñamento dunha horta no Paseo do Rato.

Neste novo espazo de convivencia, as persoas participantes poderán cultivar ao aire libre as súas hortalizas nun horto urbano de Lugo, facilitándolles así o contacto coa natureza e un lecer saudable para mellorar a súa saúde física e mental.

Tamén terán a posibilidade de participar en diferentes obradoiros formativos, aprender técnicas de agricultura ecolóxica e integrarse nun grupo para intercambiar experiencias de cultivo, coñecementos, consellos, sementes e plantas, así como boas prácticas de sustentabilidade.

Actividade gratuíta con inscrición previa ata o propio día ás 14:00 h no Espazo +60 de Lugo, no teléfono 982 241 878 ou no correo mais60lugo@afundacion.org.