CAMPAMENTO DE VERÁN SPECIAL OLYMPICS 2025, en Pontevedra
O próximo 30 de xullo comezarán os campamentos de verán Special Olympics na Residencia Afundación de Pontevedra, unha iniciativa organizada por Special Olympics Galicia —asociación formada por familias e profesionais de persoas con discapacidade intelectual— que promove a inclusión social a través do deporte, o lecer, a cultura e o voluntariado.
Este ano, un total de 295 participantes desfrutarán de actividades completas no campamento de verán, ás que se suman catro concertos a cargo do recoñecido percusionista e musicoterapeuta Pedro Campos. Estas actuacións, encadradas no noso programa «Música a Flor de Pel», buscan enriquecer a experiencia das e dos participantes a través da música en directo, unha ferramenta poderosa para o desenvolvemento emocional, cognitivo e social.
Conscientes da importancia da música como canle de comunicación e estímulo para mellorar as capacidades cognitivas, socioemocionais e motrices, seguimos achegando a música en directo aos campamentos Special Olympics. Estas xornadas festivas e divulgativas permiten aos participantes gozar dunha experiencia intensa e emotiva, onde a música se converte nunha aliada para favorecer o desenvolvemento emocional e afectivo, estimular a atención e reducir a ansiedade, e fortalecer as relacións interpersoais.
PEDRO CAMPOS
O percusionista, cantante e musicoterapeuta Pedro Campos —antigo integrante do grupo cubano David Álvarez e Xogo de Mans e da Orquestra Galega de Televisión de Galicia, entre outras formacións— ofrece un espectáculo interactivo cheo de enerxía e conexión.
En «Percuterapia. Musicoterapia», os asistentes descubren instrumentos de percusión como bongós, timbais ou maracas, mentres disfrutan de música actual e participan en dinámicas adaptadas. Campos, cunha ampla formación en neuropsicoloxía e terapia musical, combina diversión e aprendizaxe, creando un espazo onde a música e a danza son pontes para a inclusión.
Pedro Campos é graduado pola Escola de Superación Profesional de Música Antonio Mella (A Habana), máster en Deterioro Cognitivo e Neuropsicoloxía (Universidade Católica de Cuyo) e é experto en Musicoterapia (Universidade Rei Xoán Carlos), coaching e intelixencia emocional.
CALENDARIO DE CONCERTOS
29 XUN 2025 | 11.30 h
13 XUL 2025 | 11.30 h
2 AGO 2025 | 11.30 h
10 AGO 2025 | 11.30 h
Os campamentos Special Olympics impulsan a inclusión e o benestar a través da arte. A música, unha vez máis, convértese nunha linguaxe universal de emocións e oportunidades.
Aproveita para visitares a axenda web e decatáreste de todas as propostas culturais que che ofrecemos ao longo do mes. Tamén podes entrar na nosa ticketeira Ataquilla.com para informarte doutras actividades escénicas.