Andaina pola costa da Vela, Espazo +60 Ourense

Os voluntarios do grupo de sendeirismo do Espazo +60 Afundación de Ourense organizan o vindeiro 25 de setembro unha andaina pola costa da Vela. Trátase dunha ruta pola península do Morrazo, pola costa, atravesando varias praias, cunha panorámica extraordinaria da ría de Vigo e das illas Cíes.

Comezarán na praia de Liméns para continuar polo litoral ata a praia de Nerga, adentrándose no seu extenso areal para volver ao camiño pola costa unha vez pasada a praia nudista de Barra. Deixarán Punta Fusiño á súa esquerda polo camiño que leva ao faro de Punta Sobrido e á praia de Melide. En poucos metros chegarán a Punta Robaleira e cabo do Home. Este é un dos puntos máis atractivos da ruta, abríndose ante os seus ollos un amplo espectro dende cabo Silleiro ata Barbanza, a illa de Ons, os cantís da costa da Vela e fronte á espectacularidade das illas Cíes que parece poderán coller coas mans.

Despois dun descanso, comezarán un breve e suave ascenso que os conducirá a un camiño que atravesa a zona de acantilados da denominada costa da Vela ata Donón onde rematarán a ruta ao pé da Caracola. En Donón atópase o monte Facho onde aínda son visibles os restos dun castro galego do século VI a.C., así como un posto de vixilancia costeira con fins militares do que se conserva a garita. Como non podía ser menos, o horizonte que se contempla desde o cume é espléndido: a ría de Pontevedra e, mesmo nos días despexados, Ribeira na ría de Arousa. O percorrido rematará xunto á Caracola. A subida ao Facho será totalmente voluntaria por se alguén está interesado.

Lonxitude da ruta: 12 km

Dificultade: baixa

Duración: 4 horas e media

Prezo: 46€ (inclúe o transporte en autobús, seguro e xantar no restaurante Cabo Home en Donón)

Prazas limitadas. Inscríbete en Espazo +60 antes das 12.00 horas do 25 de outubro.