Marem Ladson & Cata de viño con Acreativa Live. A Coruña
Marem Ladson. Resulta bastante incrible que alguén grave un primeiro disco con apenas 19 anos e presente este nivel de imaxinación compositiva, profundidade nas letras e capacidade de interpretación. Mais é que case nada na vida de Marem Ladson resulta moi normal. O seu precoz talento, a súa seguridade sobre o escenario, a madurez con que controla cada aspecto da súa carreira sorprenden inmediatamente. Esta aparición estelar foise forxando en presenzas en escenarios e festivais coma se tal cousa. Con apenas un single («All My Storms», 2017) chamou a atención de medios e programadores, catalogando a galega/estadounidense -nai de Ourense, pai de Nova York, xogador de baloncesto que veu xogar a España- coma unha das promesas máis firmes do panorama musical.
Esa promesa faise realidade no seu disco de debut homónimo. Composto por once cancións que pasean polo pop, o rock e o folk e gravado da man de Brian Hunt e Juan Diego Gosálvez en El Invernadero (Madrid), soa inquedo, ambicioso, especial. Hai espazo para xits coma Shades of Blue, primeiro adianto do elepé; tamén para clásicos instantáneos coma Everything I've Ever Lost (Is Coming Back); elegantes e emocionantes cancións introspectivas (For and About, My Corazón) e pezas que insinúan que o futuro camiño creativo de Marem será apaixonante (Coming Home, Losing Control). Temas que falan de autoafirmación, do paso á vida adulta e de ser unha muller adolescente. Non é un disco normal.
Maridaxes, é unha proposta incluída en Acreativa Live e que constitúe unha aproximación ao talento e á obra de mulleres artistas. A actividade inclúe unha cata de viños que evocan a orixe e a obra musical das protagonistas a modo de viaxe polos sentidos e a cultura destes territorios. Posteriormente, cada artista ofrecerá un concerto coa banda completa. Participarán nesta experiencia nomes propios dentro da escena independente e referentes da fortaleza que hoxe ten a música feita por mulleres. Cada encontro será unha ocasión para viaxar polos aromas e sabores evocadores do viño que á vez nos conectarán coas cancións e o xeito de entender a arte, a música e a vida de cada unha das artistas.
Os encontros están dirixidos pola experta Cristina V Miranda.
Dirección e Produción: Acreativa (Afundación)
Comisariado por I’m The Mocker
Colabora: González Byass, Pernod Ricard e Martín Codax
*Acceso permitido a menores de 16 a 18 con autorización asinada e acompañad@s dunha persoa adulta.