Concerto REAL FILHARMONÍA DE GALICIA en Vigo

As composicións de Henry Purcell, Peter Eötvös e Johan Sebastian Bach farán vibrar o auditorio do Teatro Afundación Vigo o 15 de maio. A Real Filharmonía de Galicia, dirixida por Baldur Brönnimann e a violinista Amandine Beyer, que ademais actuará como solista canda o percusionista Juanjo Guillén, interpretará este recital #2 (EN)FOCO da Tempada de Abonos de Clásica Afundación 2025.

 

Colle xa as túas entradas soltas en Ataquilla.com

 

Colabora co noso proxecto solidario CULTURA POR ALIMENTOS, traendo unha doazón de produtos non perecedoiros para axudar os bancos de alimentos locais. Infórmate!

 

#2 (EN)FOCO

REAL FILHARMONÍA DE GALICIA

Baldur Brönnimann, director

Amandine Beyer, directora e violín

Juanjo Guillén, percusión

 

HENRY PURCELL

Curtain Tune on a Ground

 

PETER EÖTVÖS

Speaking Drums

 

HENRY PURCELL

King Arthur (Suite)

 

JOHANN SEBASTIAN BACH

Suite para orquestra núm. 3 en Re maior, BWV 1068

 

 

A artista en residencia Amandine Beyer e Baldur Brönnimann propoñen un concerto cativador, que funde o Barroco e o século XXI a través das sutís evocacións que unen as obras do programa. Comeza cos sons tempestuosos e teatrais, cheos de brillo rítmico de Curtain Tune on a Ground de Purcell, que dan paso a unha obra dunha dramaturxia hipnótica, composta en 2013 por Peter Eötvös, un compositor maxistral, fascinado pola música histórica. En Speaking Drums a percusión apodérase da escena para falar, literalmente, co conxunto da orquestra, dun xeito moi teatral. O diálogo transfórmase en loita na Suite da ópera King Arthur, na que Purcell se centrou máis no transfondo guerreiro da lenda artúrica que no máxico. Bach, a quen cita Eötvös na súa partitura, virá a rebaixar a tensión musical, coa terceira da súas catro suites para orquestra, á que pertence a celebérrima Aria. A suite ábrese cunha fanfarra de fulgor afrancesado que inicia o camiño para unha fuga de gran densidade, característica do xenio do Cantor de Leipzig.

 

Coa participación do alumnado da EAEM

 

REAL FILHARMONÍA DE GALICIA
Créase no ano 1996 en Santiago de Compostela, e ten a súa sede permanente no Auditorio de Galicia, na cidade de Santiago de Compostela. Está formada por cincuenta músicos de 17 nacionalidades diferentes. Baldur Brönnimann é, desde 2023, o seu director titular e artístico e Sebastian Zinca o seu director. Coa orquestra colaboran os máis destacados directores, cantantes e instrumentistas de todo o mundo.

A RFG está comprometida en achegar a música clásica a todo o territorio galego, aos públicos máis novos e destaca, ademais, o seu compromiso co patrimonio musical galego. Xestionada polo Consorcio de Santiago, a RFG está financiada pola Administración Xeral do Estado, a Xunta de Galicia e o Concello de Santiago.

 

Este concerto forma parte da TEMPADA DE ABONOS DE CLÁSICA Afundación 2025, pola cal podes facerte cun paquete de recitais de música clásica no Teatro Afundación de Vigo desde xaneiro a xuño con prezos axustados, desfrutando de descontos ata do 30 %.

Entra e infórmate de toda a programación AQUÍ. 

 

Aproveita para visitares a nosa axenda web e infórmate de todas as propostas culturais que che ofrecemos ao longo do mes ou entra na nosa billeteira online Ataquilla.com para máis actividades escénicas.