Concerto REAL FILHARMONÍA DE GALICIA en Vigo

ENCRUCILLADA é o novo recital que a Real Filharmonía de Galicia trae a Vigo con motivo da Tempada de Abonos de Clásica Afundación 2025. Coa dirección de Sebastian Zinca e o acordeón de Iñaki Alberdi, a orquestra interpretará un repertorio da recentemente falecida Sofiya Gubaidulina, a compositora rusa; e mais do clásico Dmitri Shostakovich. Será o 11 de abril no Teatro Afundación Vigo. 

 

Coge xa as túas entradas en Ataquilla.com

 

Ven ao concerto e colabora con CULTURA POR ALIMENTOS, o noso programa solidario co que te invitamos a achegares algúns produtos non perecedoiros para o Banco de Alimentos local. Infórmate.

 

Director | Sebastian Zinca

Acordeón | Iñaki Alberdi

 

 

 

Sofiya Gubaidulina

 Fachwerk

 

Dmitri Shostakovich

 Sinfonía núm. 1 en Fa menor, op. 10

 

 

Coa participación do alumnado da EAEM.

 

A biografía de Sofiya Gubaidulina é como unha cartografía sonora da Rusia que lle tocou vivir a esta compositora tártara, de profundas conviccións relixiosas. Persoa non grata para o réxime político, non viaxará ao estranxeiro ata finais dos anos 80, década a partir da cal recibirá grandes recoñecementos internacionais. En Fachwerk presenta un diálogo entre as dúas culturas musicais que tan ben coñece, a occidental e a tártara, simbolizada no baián, unha sorte de acordeón para o que adoita escribir. Cinco anos antes de nacer Gubaidulina, Shostakovich estreou a súa primeira sinfonía cun grande éxito; era 1926 e o compositor tiña 20 anos. Nela latexa esa ironía burlona que se tornará sarcasmo nas 14 sinfonías seguintes.

Shostakovich guíanos pola alegría no primeiro tempo e pola desolación no terceiro, dunha tristeza que abraia nun mozo que compuxo así unha profecía involuntaria.

 

Podes descargar tamén as notas ao programa abaixo.

 

REAL FILHARMONÍA DE GALICIA
Créase no ano 1996 en Santiago de Compostela, e ten a súa sede permanente no Auditorio de Galicia, na cidade de Santiago de Compostela. Está formada por cincuenta músicos de 17 nacionalidades diferentes. Baldur Brönnimann é, desde 2023, o seu director titular e artístico e Sebastian Zinca o seu director. Coa orquestra colaboran os máis destacados directores, cantantes e instrumentistas de todo o mundo.

A RFG está comprometida en achegar a música clásica a todo o territorio galego, aos públicos máis novos e destaca, ademais, o seu compromiso co patrimonio musical galego. Xestionada polo Consorcio de Santiago, a RFG está financiada pola Administración Xeral do Estado, a Xunta de Galicia e o Concello de Santiago.

 

Este concerto forma parte da TEMPADA DE ABONOS DE CLÁSICA Afundación 2025, pola cal podes facerte cun paquete de recitais de música clásica no Teatro Afundación de Vigo desde xaneiro a xuño con prezos axustados, desfrutando de descontos ata do 30 %.

Entra e infórmate de toda a programación AQUÍ. 

 

Aproveita para visitares a nosa axenda web e infórmate de todas as propostas culturais que che ofrecemos ao longo do mes ou entra na nosa billeteira online Ataquilla.com para máis actividades escénicas.