As persoas maiores protagonizan nos Espazos+60 de Afundación unha acción colectiva contra o idadismo

Co obxectivo de «abrir a conversa sobre o idadismo» Afundación invitou ás persoas socias dos 11 Espazos +60 que ten nas catro provincias a «facer un xesto colectivo», coincidindo coa conmemoración do Día Internacional das Persoas Maiores, instituído pola ONU en 1990 e que se celebra anualmente cada 1 de outubro.

Ao longo de toda a xornada, en cada unha das actividades que se desenvolven nos Espazos +60 da Coruña, Lugo, Ourense, Pontevedra, Santiago, Vigo, Ferrol, Betanzos, Monforte, Pontedeume e Viveiro, leuse un manifesto en defensa do lema «por unha sociedade libre de idadismo», no que se expresa a necesidade dunha «ollada que celebre a diversidade en todos os ámbitos, que constrúa un modelo de convivencia interxeracional unindo forzas, compartindo saberes e aprendendo xuntos e xuntas, proclamando que cada ano suma valor, non resta» e se aposta «por unha sociedade para todas as idades e todas as persoas, construída en común».

Así mesmo, convidouse ás persoas socias a compartir as súas reflexións escribindo en tarxetas unha resposta á pregunta «Que quero seguer a facer sen que a idade me free».

MANIFIESTO:

Hoxe, Día Internacional das Persoas Maiores, reafirmamos que envellecer é a expresión dun percorrido vital, unha fonte de valor que merece ser celebrada e respectada por toda a sociedade. Cada persoa maior experimentou unha existencia de cambios, aprendizaxes, esforzos e achegas que contribuíron á configuración do mundo no que hoxe vivimos.

Traballamos por unha comunidade que valore a experiencia e erradique o idadismo en todas as súas formas. Promovemos unha ollada sen estereotipos limitantes, sen prexuízos que xeran exclusión; unha ollada que impulse accións, prácticas e políticas, que garantan os dereitos e a igualdade de oportunidades con independencia da idade.

Demandamos un trato baseado no respecto, que recoñeza as nosas características individuais, a nosa autonomía e a nosa dignidade. Reivindicamos unha comunicación que evite a condescendencia e nos visibilice como persoas con capacidade de seguir decidindo, aprendendo, creando e emprendendo novos proxectos. Do mesmo xeito, avogamos pola eliminación das barreiras que impidan a nosa plena participación, como a discriminación laboral, o desigual acceso a tratamentos e servizos de saúde ou o deseño de tecnoloxías e espazos públicos que nos exclúen.

Manifestamos a necesidade dunha ollada que celebre a diversidade en todos os ámbitos. En especial, destacamos a valiosa contribución das mulleres maiores e promovemos unha cultura que aprecie a beleza da experiencia e da autenticidade, liberándonos de canons imposibles que só xeran malestar. Día Internacional das Persoas Maiores Lema: “Por unha sociedade libre de idadismo”.

Aspiramos ao recoñecemento dunha cidadanía de pleno dereito, para decidir, cocrear e participar activamente na vida comunitaria, política e cultural. Lonxe de sermos unha carga, somos piares para o progreso, axentes clave na conciliación familiar e provedores esenciais de coidados. A nosa experiencia, resiliencia, vitalidade e creatividade enriquecen e fortalecen o tecido social.

Defendemos un modelo de convivencia interxeracional baseado na colaboración e no respecto mutuo. Rexeitamos calquera discurso que pretenda enfrontar a mocidade e as persoas maiores, porque temos o convencemento de que o futuro se constrúe da man, compartindo saberes, escoitándonos e aprendendo unhas persoas das outras. O diálogo e a solidariedade entre xeracións son a base máis sólida para unha sociedade xusta, innovadora e cohesionada.

Hoxe, erguemos colectivamente a nosa voz para proclamar que: cada ano vivido suma valor, experiencia e sabedoría. Esiximos políticas, espazos e actitudes que favorezan un envellecemento activo, saudable e participativo, que nos permitan seguir gozando, aprendendo, desenvolvéndonos e achegando.

Por iso, neste 1 de outubro, declaramos:

O noso compromiso cunha sociedade onde a diversidade de idades sexa recoñecida como unha riqueza colectiva que fortalece a democracia.

A nosa convicción de que o respecto, a inclusión e a colaboración son os alicerces dun futuro sostible para todas e todos.

A nosa determinación para traballar en conxunto con todas as xeracións na construción dunha sociedade libre de idadismo.

Estamos aquí presentes coa enerxía e a experiencia para seguir participando e contribuíndo. Por unha sociedade para todas as idades e todas as persoas, construída en común.