Axenda

Entrega do XVIII Premio de Poesía Afundación a ORIANA MÉNDEZ en AfundaciónTV

{evento-titulo_ga}
Oriana Méndez, a nova premiada da edición de 2020 presenta desde AfundaciónTV, nun acto non aberto ao público por mor da crise sanitaria, o poemario gañador INTERNA. O libro foi escollido consensuadamente polo xurado, representado desta volta por Luís González Tosar, Xabier Castro Martínez, Marica Campo, Eulalia Agrelo Costas e César Lorenzo Gil. 
Oriana Méndez elixiu unha peza do artista plástico vigués Ramón Trigo, con obra na Colección de Arte Afundación, para ilustrar o seu libro. Con tal motivo, Trigo amosa neste acto de entrega e presentación do poemario, un audiovisual inspirado nunha escolma de poemas de Oriana, previo ao recitado da gañadora. Podes velo a seguir.
 
 
 
Podes seguir o acto online desde Afundación TV!

Oriana Méndez (Vigo, 1984) é licenciada en Filoloxía Galega e máster en Estudos Culturais pola USC. Publicou os libros de poesía Derradeiras conversas co capitán Kraft (2007), Cero (2011) e O que precede a caída é branco (XVII Premio de poesía do Concello de Carral, 2015). En 2019 gañou o V Premio Rosalía de Castro do Concello de Padrón con O corazón pronúnciase extenso, que se publicará proximamente en Espiral Maior.

Foi parte, entre outras, das antoloxías Anthology of Galician Literature (1981-2011); Novas de poesía. 17 poetas, antoloxía bilingüe galego-castelán ou tamén 13. Antoloxía da poesía galega próxima, escolma tamén bilingüe galego-castelán editada por Chan da Pólvora e Papeles Mínimos.

Viu publicados algúns dos seus poemas en revistas de ámbito galego, coma Dorna. Expresión poética galega; de ámbito hispano, coma Nayagua, revista do Centro de poesía José Hierro e de ámbito anglosaxón, Waxwing Literary Journal, con tradución ao inglés de Neil Anderson.

Participa en recitais e encontros literarios coma o Festival dos Eidos, promovido pola Fundación Uxío Novoneyra; o XIV Festival Cosmopoética, do concello de Córdoba; o Festival de Poesía no Condado; ou o festival do concello de Santiago de Compostela Festival Alguén que respira!