ANDAINA A EMBELESADORA - Espazo +60 Ourense

Comeza xunto á capela da igrexa de Vilela, situada na marxe dereita da N-540 que une Ourense con Lugo. O primeiro tramo discorre por unha estrada local que nos leva ás pequenas aldeas de Bispo e Sisto para, unha vez pasada esta última, adentrarnos nun camiño ancho entre bosques de castiñeiros, carballos, piñeiros e xestas, salpicados por zonas de pradarías, na procura do río Miño e do encoro de Belesar.

Comezamos a descender cara ao río polas primeiras zonas de viñedos e adegas que forman un belo conxunto. Unha vez na parte máis baixa, o camiño discorre á beira do encoro contemplando toda a zona de viñedos dispostos en socalcos, así como as innumerables adegas que conforman unha paisaxe espectacular. Se o nivel das augas estivese baixo, poderemos contemplar con total nitidez o Castro de Candaz. Son os restos dun castro prerromano e posterior fortaleza medieval situada na desembocadura dos ríos Lama e Enviande no Miño.

Ao final do percorrido polas beiras do encoro podemos ver enfronte a pequena Central Hidráulica do Souto de Esteban e o enérxico discorrer das augas do Enviande cara ao pai Miño. Chegados a este punto iniciamos o camiño de regreso por unha pista de cemento, que rematará sendo de asfalto, un curto tramo que será a única dificultade da xornada.

Unha vez concluído este ascenso, entraremos nunha continuación de sendeiros de servizo de hortas e prados das distintas poboacións polas que iremos pasando: A Fonte, A Touza, A Laxa, O Sestelo, Sebrecedo, Rioseco e Vilar, antes de chegar ao final da ruta no punto de inicio.

De pago: 40 € (ata 25 plazas), 35 € (ata 35 plazas)

APÚNTATE neste formulario ou chamando ao 988 23 63 03