10 entidades sociais incorporarán o programa «COÑECENDO AS EMOCIÓNS», dirixido a persoas maiores
Dez entidades sociais, principalmente vinculadas ao ámbito do envellecemento activo, desenvolverán o próximo outono o programa de Afundación «Coñecendo as emocións», con persoas usuarias das súas organizacións. A iniciativa foi codeseñada con persoas maiores, testada, validada e implementada en tres edicións sucesivas nas que participaron 255 persoas de distintas localidades galegas, tanto rurais como urbanas. Os resultados obtidos evidencian que o programa permitiu a mellora do benestar e a adquisición de competencias emocionais das persoas participantes, segundo a investigación realizada por Afundación e Matia Instituto.
Un total de 17 psicólogas, membros dos equipos das organizacións que van incorporar o programa, participaron no Centro Obra Social ABANCA de Santiago de Compostela nunha sesión formativa inicial sobre a súa metodoloxía xeral.
O programa iniciarase entre os meses de setembro e outubro en 17 localidades de toda Galicia. Así, a Confederación Galega de Persoas con Discapacidade (COGAMI) levarao a cabo no Porriño, Vigo, Arteixo e A Pobra do Caramiñal; Cruz Vermella desenvolverao na Coruña, Lugo e Ourense ; AFAPO Alzhéimer en Pontevedra; AGADEA Alzhéimer na Estrada e Ribeira; ATEGAL levarao a cabo en Lalín e Padrón; o Centro de Desenvolvemento Rural O Viso en Lodoselo (Ourense); a Asociación Ourensá de Esclerose Múltiple, Párkinson e Enfermidades Raras AODEMPER en Ourense; en Tomiño desenvolverao o Concello Tomiño; o centro de día «Mimosas» levarao a Ribadumia e o centro de día «Contigo» a Cangas do Morrazo.
Adquirir competencias emocionais, tamén despois de cumprir máis de 60 anos, é unha ferramenta de extraordinaria utilidade para a mellora do benestar. Así se desprende da investigación dos resultados do proxecto «Coñecendo as emocións», de Afundación, desenvolvido en colaboración con Matia, instituto xerontolóxico de referencia en España na materia e con máis de 20 anos de traxectoria. Tras compartir estas conclusións no mes de febreiro con distintas entidades ás que se convidou a participar no programa, iníciase agora unha nova etapa que permitirá estender os seus beneficios ás persoas usuarias das organizacións participantes.