Manuel Vilariño: Emboscadura

A relación de Vilariño cos animais contén moita da fascinación que por eles se profesa na infancia, nese período en que se acumulan os descubrimentos e a proporción do novo é infinitamente superior ao xa coñecido. No proceso de creación, Vilariño convértese nun chamán que prepara aos seus animais para a viaxe desde o inferno ao paraíso. As súas escenificacións non son só presenzas de obxectos e suxeitos, senón que significan un diálogo entre o artista e os materiais. As imaxes que crea prescinden da beleza convencional e remítennos a un imaxinario mítico. Animais e obxectos relaciónanse a través de formas que encaixan amodo.