Cándido Fernández Mazas: Vangarda, militancia e esquecemento: 1902-1942

O intelectual ourensano Cándido Fernández Mazas, escritor, gravador, debuxante e pintor, está considerado como un dos grandes debuxantes españois da primeira metade do século xx. Foi membro da vangarda parisiense e amigo de boa parte da máis brillante intelectualidade do seu tempo, participando activamente en manifestos, faladoiros e publicacións diversas, como as revistas Nós, Alfar ou La Zarpa, entre outras. Ao igual que moitos intelectuais e artistas foi inxustamente esquecido, debido ao terrible corte que supuxo a guerra civil e ao seu temperán falecemento nos primeiros anos da posguerra. Este catálogo, realizado con motivo da exposición exhibida en Ourense en 2002, centenario do seu nacemento, presenta a colección máis completa de Fernández Mazas que se puidese reunir, ademais de gran cantidade de datos biográficos e testemuños.