De planta oval, o vestíbulo ten unha superficie de 91 m2 e está rodeado por columnas de capitel xónico. Dúas grandes lámpadas realzan a suntuosidade decorativa. A escaleira de honra parte deste espazo en arranque único, bifurcándose despois por ambos os lados en curva ata o piso superior, para dar acceso ás distintas dependencias. Esta escaleira, iluminada cenitalmente a través dunha vidreira realizada pola famosa Casa Maumejean, contribúe de forma decisiva á prestancia do conxunto.
O vestíbulo foi proxectado como complemento idóneo do teatro. Pode utilizarse como espazo de descanso nas representacións ou concertos, para recepcións, cócteles ou caterings.