Afundación celebra o incremento do número de participantes na XXIII edición do Premio de Poesía Afundación

Afundación, a Obra Social de ABANCA, a Consellería de Cultura, Lingua e Xuventude da Xunta de Galicia e o Centro Pen de Galicia oficializaron o peche do prazo para a admisión de propostas concorrentes á vixésimo terceira edición do Premio de Poesía Afundación o pasado 31 de xullo. En total, 44 poemarios presentados, que serán valorados por un xurado que este ano terá un dos maiores rexistros do histórico recente deste certame, un fito que, desde Afundación, é recibido como un evidente reflexo do momento de elevada produtividade e alta calidade das letras galegas.

A decisión do xurado farase pública a través dos medios de comunicación no outono de 2025. O texto gañador recibirá un único premio de 7000 euros, e será publicado, ademais, na colección «Arte de Trobar».

A HISTORIA DO PREMIO

O galardón, un dos mellor dotados do ámbito literario galego, nace no ano 2002 a instancias do Pen Club de Galicia e de Afundación co obxectivo de reforzar a imprescindible produción poética en galego e continuar o enriquecemento da creación cultura galega actual.

No seu elenco de gañadores figuran poetas como Xavier Seoane, María do Cebreiro, Román Raña, Arcadio López Casanova, Marilar Aleixandre, Carlos Penelas, Luís Valle Regueiro, Emma Pedreira, Xavier Rodríguez Baixeras, X. Daniel Costas, Yolanda Castaño, Elías Portela, Miguel Anxo Fernán Vello e Olalla Cociña, Estíbaliz Espinosa, Gonzalo Hermo, Miguel Sande, Oriana Méndez, Medos Romero, Ledicia Costas, Rafael Vilar ou Miguel Rodríguez Monteavaro, gañador da pasada convocatoria.

Esta edición número vinte e tres conta co apoio e a participación da Consellería de Cultura, Lingua e Xuventude, a través da Dirección Xeral de Cultura, que vén colaborando desde hai anos con esta cita de referencia na axenda cultural galega, ao tempo que estimula a creación literaria.