Afundación anuncia as persoas finalistas do XVII Premio Afundación de Xornalismo Fernández del Riego
15.10.2020. Afundación, a Obra Social de ABANCA, deu a coñecer hoxe na Sede Afundación de Pontevedra os artigos finalistas do Premio Afundación de Xornalismo Fernández del Riego. Tras a deliberación do xurado, integrado por Víctor Freixanes, Carlos Valle, Fina Casalderrey, Gloria Rodríguez e Inma López, fíxose pública a resolución das persoas finalistas desta edición. A lectura pública da acta correu a cargo de Carlos Valle, secretario do xurado. Son finalistas, xa que logo, Míriam Ferradáns, polo seu artigo «Aprender a contar», publicado en Sermos Galicia; Diego Giráldez, por «A cardiopatía de Xulia», en Praza Pública; e Cristina Pato por «Realidades paralelas», en La Voz de Galicia.
Na rolda de prensa de hoxe, Pedro Otero, director xerente de Afundación, subliñou «tanto o complicado labor de selección do xurado, dada a calidade dos textos presentado, como o papel esencial que o xornalismo desempeña e que, en momentos tan extraordinarios como o actual, se nos revela imprescindible». Víctor Freixanes, pola súa banda, quixo «recoñecer todas as persoas que presentaron os seus artigos para seren sometidos á valoración do xurado, quen, nesta edición, tivo un debate extenso dado o sobresaínte nivel dos textos concorrentes».
O material de audio e gráfico e desta rolda de prensa está dispoñible nesta ligazón.
Un total de 19 artigos optaban á XVII edición do Premio Fernández del Riego. Podían presentarse artigos incluídos no xénero do xornalismo literario ou ben no xénero de artigo de opinión, coa única condición de que só se presentase un texto por autor que fose recollido entre o 1 de xaneiro e o 31 de decembro de 2019 en calquera medio de comunicación, impreso ou dixital, de cabeceiras recoñecidas e escrito en lingua galega.
O premio está dotado con 10 000 euros. Entre os gañadores podemos sinalar nomes tan importantes como Fina Casalderrey, Carlos G. Reigosa, Rosa Aneiros, Manuel Rivas, Manuel Bragado, Luís Pousa, Ramón Loureiro, Tamara Montero, Miguel Anxo Murado ou Inma López Silva, gañadora da última edición.