Conferencia IAIA VICENTA, INSTRUCIÓNS PARA SER HUMANOS, na Coruña

Presentamos a Iaia Vicenta, unha personaxe de ficción nacida da IA que se converteu nun fenómeno viral en redes sociais, con vídeos que acadaron millóns de visualizacións falando sobre educación. O 22 de abril, na Sede Afundación A Coruña acollemos esta conferencia do ciclo EDUCACIÓN S. XXI, que pretende facernos reflexionar sobre como as ferramentas tecnolóxicas están a transformar a educación da xente máis nova e, sobre todo, sobre o uso consciente e responsable da tecnoloxía. 

 

 

Detrás da Iaia Vicenta está Manuel Rossell, que creou esta personaxe para promover a IA como aliada para abordar a importancia de establecer límites e fomentar un uso intelixente da tecnoloxía na vida dos e das menores.

O avatar é a propia avoa de Manuel, Dona Vicenta, agora Iaia Vicenta, unha muller de 94 anos cunha presenza que xa suma medio millón de seguidores de todas as idades. Ambos residen en Valencia, e a súa historia conecta con públicos diversos que buscan educación, ética e humanidade na era dixital.

Para Manuel Rossell, a Intelixencia Artificial non é a fin da creatividade; é o exame final da nosa humanidade. Vicenta demostra que a tecnoloxía pode ser fría, mais a súa mensaxe non ten por que selo. Non importa se o píxel é falso se a emoción que provoca é verdadeira. Coa Iaia Vicenta establecemos unha ponte: conectamos cunha figura de autoridade moral que, na política e a TV actuais, parece faltar. O verdadeiro risco non é que a IA teña sentimentos, senón que nós perdamos os nosos ao comunicármonos.

Esta conferencia propón un enfoque humano, ético e práctico para que docentes, familias e mocidade aproveiten o potencial da IA.

 

CICLO EDUCACIÓN S. XXI

Un programa de conferencias para dar a coñecer as últimas tendencias, estudos e teorías sobre educación a toda a comunidade escolar e ao público xeral. Grandes especialistas xa pasaron polos nosos edificios. Se tes interese en visualizar estes contidos, bota un ollo en Afundacion.tv

 

Non perdas nada da nosa programación consultando a axenda. E para máis espectáculos, agardámoste en Ataquilla.com