Música e artes escénicas protagonizan a programación do Teatro Afundación
Dúas obras teatrais inauguran e pechan a programación do mes de outubro do Teatro Afundación, composta por un total de 20 espectáculos: 4 monólogos, 2 obras, 4 concertos de música popular, outros 8 dedicados á música clásica e o jazz, un espectáculo de ballet e a Gran Gala Internacional de Maxia «Galicia Ilusiona». Mañá, día 2 de outubro, a actriz Ana Torrent e o resto do elenco de As amargas bágoas de Petra von Kant inaugurarán a oferta de cultura e espectáculos do mes. O grupo vigués Eladio y los Seres Queridos, a cantante Tamara e o Tributo a The Beatles «Abbey Road» completan a programación desta semana. O cómico Ernesto Sevilla encargarase de poñer un peche cheo de humor á programación do mes con Yo, literal. Será o 31 de outubro nunha función para a que quedan contadas entradas. As aínda dispoñibles, para este espectáculo e para todos os que se poderán desfrutar no Teatro Afundación durante o mes de outubro, están dispoñibles en Ataquilla.com.
Hai imaxes algúns dos espectáculos nesta ligazón.
De Eladio y los Seres Queridos a Miguel Ríos
O concerto de Eladio y los Seres Queridos, que se celebra este venres día 3, é unha das citas máis importantes da programación. O conxunto vigués celebra 20 anos de traxectoria cun concerto para o público da súa cidade no que, ademais, presentará o seu novo traballo, o álbum B.S.O. 2005-2025, unha antoloxía con boa parte dos seus temas máis celebrados.
Un día despois, o sábado 4, será a quenda do concerto tributo a The Beatles. Xa o domingo, o público do Teatro Afundación poderá gozar do concerto en que a cantante Tamara fai parada en Vigo na xira na que celebra 25 anos de éxitos.
Completa a programación de música popular, o venres 10, o concerto doutro nome imprescindible no panorama da música española: Miguel Ríos. O cantante granadino presenta El último vals.
Jazz e música clásica
O Festival Musicav, organizado polo Café Vitruvia, programa durante o mes 5 concertos. O primeiro será o do martes 7 de outubro, a cargo de Vitruvia Arte Ensemble, con Alberto Conde ao piano e nunha sesión musical na que interpretarán temas de Duke Ellington. Unha semana despois será tempo da sorprendente música do compositor, violinista e improvisador portugués José Valente. O músico, que na súa traxectoria compartiu concertos con lendas como Paquito D’Rivera no Carnegie Hall, presentará o seu traballo Quem é o José Valente ―14 de outubro―.
Musicav ofrece ademais os concertos De Bach a Glass, o 21 de outubro, e a actuación da Charo Quicler Jazz Band ―día 22―, que interpretará temas inmortalizados polas cantantes Billie Holiday, Sarah Vaughan e Ela Fitzgerald. Na clausara de Musicav, o público poderá ver a película de cinema mudo Nosferatu con música en vivo a cargo de Caspervek Ensemble.
O Teatro Afundación programa en outubro, ademais, tres citas coa música clásica e unha co ballet. A soprano Ainhoa Arteta preséntase no concerto Unha noite de zarzuela o 18 de outubro nun concerto que forma parte das propostas do «Outono Lírico» que promove a asociación Amigos da Ópera de Vigo. A Orquestra Sinfónica de Galicia (OSG), dirixida por Roberto González-Monjas, interpretará dúas composicións de Ravel e Mozart o 23 de outubro. Un día despois, o venres 24, será a Orquestra Clásica de Vigo a que se suba ao escenario. Tocarán a V Sinfonía e o Concerto n.3 para piano de Beethoven.
Maxia, ballet e moito teatro
O ilusionismo chega en outubro ao Teatro Afundación coa gala internacional de maxia «Galicia Ilusiona» os días 11 e 12 de outubro. O martes 14, será tempo de danza: o Ballet de Kiev interpreta O lago dos cisnes.
O último sábado do mes, o día 25, o público poderá elixir entre 3 experiencias escénicas diferentes: ás 12 do mediodía, Miguel Assad presenta Salvar vidas, o espectáculo no que ensina a resolver as principais situacións de emerxencia. Ás 18 horas, e no Auditorio do Teatro Afundación, será a quenda de Daniel Fez co seu último monólogo, La vida regulinchi. Ás 20 horas, e coas entradas xa case esgotadas, será a primeira das citas con Ángel Martín e a súa comedia Somos monos. O actor repite función ao día seguinte, o domingo 26, ás 20:30 horas.
Completan a programación escénica, os días 30 e 31, respectivamente, a versión de Seis personajes en busca de autor que dirixe Pepa Gamboa e é parte da Tempada de Abonos de teatro; e o monólogo Yo, literal, con Ernesto Sevilla.
«Cultura por alimentos»
Moitos dos eventos que se programan no Teatro Afundación forman parte do programa solidario «Cultura por alimentos», desenvolto pola Obra Social de ABANCA en colaboración coa Federación Española de Bancos de Alimentos (FESBAL). As persoas que asisten aos espectáculos poden colaborar depositando alimentos non perecedoiros nos contedores dispostos para tal fin. As doazóns serán distribuídas por FESBAL entre familias en risco de exclusión de Vigo e a súa área de influencia.