Comentarios
O Santo, de pé, en figura de tres cuartos, destaca en rigoroso primeiro plano co corpo cortado polo bordo da tea. A personaxe, con barba e cabeleira ó vento, apreta un pergamiño contra o peito á vez que, cun lixeiro movemento, estende un brazo cara adiante. O fondo, ó aire libre, con rompemento de ceo, reforza a impactante presencia da figura, que provoca arrepío, tanto polo expresionismo do rostro coma polo das teas, na execución das cales o brío e maila cor se aúnan coa materia densa e suntuosa, empapada de luz, que se espande por toda a túnica coma unha refulxente laparada de verdes con brancos e vermellos.
