SAN JOSÉ

Comentarios

As figuras dos nacementos de Baltar están investidas dunha extraordinaria dozura e humanidade. Inspíranse en xentes entrañables e humildes que o autor, en moitos casos, coñeceu personalmente. O material empregado é o barro policromado, o que enriquece á obra e acentúa a expresividade das figuras creadas directamente cunhas mans que delatan coñecementos da arte tradicional galega.

A Virxe María é unha muller sinxela e repousada que se presrnta sentada e descalza, cunhas vestiduras alegres e coloristas, case populares polas súas formas decorativas. Leva ao Neno Xesús, gordiño e rebuldeiro, que dirixe cara ela a súa mirada mentres a súa nai mantén unha actitude contemplativa, chea de dozura. San Xosé, coa face envellecida, lembra a un peregrino canso camiño de Compostela. Os seus ollos entoados delatan que está durmido, posiblemente soñando coa Matanza dos Inocentes, premonición pola que deciden fuxir a Exipto.

A Sagrada Familia está acompañada por dous pastorciñas, cuns rostros, carregados de devoción e espiritualidade, constitúen o mellor exemplo da capacidade do autor para transmitir emocións e sentimentos universais. O único elemento de referencia escenográfica e espacial é o toro da árbore que sitúa ás figuras nun contexto natural e simbólico.

A forza expresiva dos rostros identifica aos personaxes transmitindo os ideais relixiosos que caracterizan a cada un deles, a Gracia, a Serenidade e a Fe.