Encantamiento mágico

Comentarios

Neste díptico de Mingos Teixeira, pintor abstracto e informalista que xoga coas texturas creando manchas grumosas de cor, sorprende o contraste de sensacións: movemento fronte a estatismo.
O lenzo dereito é un xogo de cores fortes, sen formas evidentes, que se dispoñen horizontalmente, rotos nalgún momento polo gris con que reviste o fondo. Moi interesado na cor que formula como unha forma de comunicación na arte, utiliza tons vivos, creando un cromatismo intenso de vermellos, rosados e laranxas na parte superior, que se transforman en tons escuros, negros, azuis e morados na parte inferior. Un horizonte crepuscular, onde os tons son os auténticos protagonistas.
No lenzo esquerdo, as pinceladas superpóñense creando texturas empastadas e calibradas que se mesturan co fondo mediante trazos expresivos e xestuais. O gris únese ao morado, ao laranxa, ao vermello e ao branco nunha composición intimista.

Unha peza onde as dúas partes se complementan, porque mentres unha presenta unha pincelada suave e sosegada que dá sensación de quietude, a outra, xestual e intensa, transmite sentimentos de forza e movemento.