MANCO
Comentarios
Esta obra orixinal e distinta que, partindo do simple logra resultados sorprendentes, é do artista Héctor Francesch.Un artista que ten entre as súas referencias a Luis Seoane, Jorge Castillo ou o Laboratorio de Formas de Galicia, ademais das características propias doutras linguaxes como son o cinema, a TV, o cómic, os anuncios, etc., onde é clara a influencia do mundo da imaxe, a cultura da manipulación.
Pintor autodidacta, nel observamos o dominio do debuxo a través de distintas perspectivas que compón en diferentes planos. Utiliza símbolos e signos que dende sempre o rodearon, plasmando recordos da súa infancia.
Unha obra esquemática e sintética onde non falta o sentido do humor; neste caso, a través de frases intelixentes e sarcásticas.
Composición de diferentes planos e perspectivas sobre cores planas, puras e tremendamente coloristas, nas que destaca unha extraordinaria sensibilidade cromática.
Un artista que busca construír imaxes belas, orixinais e equilibradas que conten historias coñecidas.