PUEBLO CON IGLESIA

Comentarios

É indubidable a influencia da paisaxe americana, das súas experiencias en Brasil onde residiu durante un longo tempo, feito que deixou gravado na memoria do autor recordos cos que vestir as súas obras de luz transparente, de arquitecturas brancas e de vexetacións exóticas.

A igrexa encalada, de estilo tipicamente colonial, centra a composición ofrecendo unha vista lateral. A escala do templo, a súa monumentalidade, exemplifica a importancia da relixión na vida cotiá, no planeamento urbanístico da vila que se ordea a partir do edificio de culto.

O lucido abraiante reviste o santuario dun significado simbólico, sobrecolledor en contraste coa humildade do contorno, do arrabalde onde dominan os pardos, ocres, marróns e negros de triste sinfonía que se quebra ante a pureza do branco e o resplandor da luz.