SIN TÍTULO

Comentarios

Dotada de misterio e de gran personalidade, esta obra de linguaxe abstracta na que os elementos desempeñan un papel decisivo forma parte das moitas imaxes que nos deixa a súa autora Berta Cáccamo, unha artista innovadora tanto na forma coma no contido.
Unha imaxe xestual e espacialista chea de poesía onde a sinxeleza e a delicadeza conseguen un efecto harmonioso. Formas de gran forza expresiva que dan paso á luminosidade, nun silencio que nos enche de forma serena.
A forza da cor avanza pola tea con levidade sen apenas manipulación, confrontando a sensación entre o cheo e o baleiro. A exaltación dunhas formas redondeadas que recordan a natureza xorden da improvisación, enchendo de pequenos matices e tonalidades a obra. Manchas acuareladas como un torrente sanguíneo que discorren sobre un fondo branco que non deixa indiferente pola súa luz.
Reflexión e rotundidade, unha linguaxe visual propia onde a idea compite en protagonismo coa obra en si.