Comentarios
Un dos motivos favoritos de Fernández Cersa son as paraxes da Ría de Vigo. Reflicte aquí unha paisaxe clara e limpa cunha visión apegada ó real e unha gama cromática que trasloce a luz, a cor, e a atmosfera da paisaxe galega. En tódalas súas obras vese un interese por representa-lo espacio, e capta-lo efecto de profundidade. Gústalle deixar marcados os distintos planos da paisaxe: a auga en primeiro termo, un arboredo no segundo plano e a liña do horizonte na metade do cadro. Os empastes máis grosos atópanse no ceo e na zona sombría das árbores.
