Comentarios
A obra, que nace directamente da vida, da observación sincera da realidade, apóiase nos tres eixes básicos da preocupación plástica do autor, luz, cor e forma, para expresar, dende o concreto, un sentimento universal.
Nun violento primeiro plano preséntase a unha peixeira nova sostendo o seu sinal de identidade, a patela. A súa mirada seduce de inmediato polos seus impresionantes ollos e polo seu porte directo e orgulloso, en actitude de pose, totalmente consciente de que está sendo observada.
A figura, ben construída, sólida e monumental, delata o dominio do debuxo. A pincelada, solta e impresionista, xoga coa cor para defini-los rasgos, buscando o contraste cromático entre os tons verdes do fondo cos vermellos do vestido.
Os cabelos, longos e sensuais, permiten traspasa-la luz que envolve a figura e xera, en torno á moza, un halo luminoso que a converte, ó igual cás peixeiras de Colmeiro, nunha figura atemporal, símbolo de tódalas mulleres do mar.
