Comentarios
Dedícalle ó Páramo unha serie de cadros que son variacións dunha paisaxe na que sempre descobre algo novo. Non son nunca paisaxes pintorescas. Son imaxes recreadas pola mirada poética do artista. As gramíneas do primeiro termo precipítanse sobre o plano do cadro, retendo na intensidade dos marelos e alaranxados a luz e maila atmosfera destas terras, nas que penetra o pintor, indo directamente á esencia da paisaxe sen ningún tipo de anécdota. O resultado é unha escena fragmentaria, chea de frescura e xuventude, solidamente construída, que mantén unha intensa vibración ó contemplala.
