PURI DEL PALACIO

Descendente dunha familia de intelectuais e artistas, entre os que está o poeta Manuel del Palacio, viviu na súa nenez o interese pola arte. A súa facilidade para o debuxo invitouna a pintar desde moi nova. Profesionalmente dedicada á decoración, tarefa na que realizou obras moi estimables, fixo exposicións en diversas cidades de España, entre elas Madrid e Vigo. Pury del Palacio é unha artista neorromántica con figuras, interiores e bodegóns que amosan un empaste sobre un debuxo firme, moi estilizado. Posúe unha elegancia natural nun mundo de nostalxia, deliberadamente decorativo, con fortes contrastes cromáticos, que van do verde ó vermello e do marelo ó azul. É moderna canto ó concepto, sen necesidade de recorrer a invencións abstractivas. En definitiva, é unha pintora grata, preocupada pola calidade formal da súa obra, mais sen caer nunca en fríos academicismos.