Exposición LA PALMA. VOLCÁN E VIDA en Ourense

45 imaxes do fotógrafo palmeiro Abián San Gil, canda textos da poeta palmeira Elsa López, o chef José Andrés, o xornalista de viaxes Ander Izaguirre e o escritor de natureza Gabi Martínez conforman esta espectacular exposición sobre o fenómeno natural e as súas repercusións na súa comunidade. A psicóloga Belén Colomina tamén participa cun relato elaborado para a ocasión en que narra os conceptos fundamentais que conducen o ser humano á superación do drama, á busca de novos escenarios de vida, e á importancia de realizar esta aprendizaxe en comunidade e da man da natureza.

A exposición ofrece, a través das 45 fotografías asinadas polo fotógrafo palmeiro, unha narración en primeira persoa sobre como se viviu este fenómeno desde a illa canaria para que, quen a visite, poida sentirse máis próximo á súa comunidade e aprender dos recursos emocionais que despregaron.

Sobre o seu traballo como fotógrafo ao comezo da erupción, Abián San Gil sinala: «intentei capturar todos os momentos posibles. Estiven horas antes de empezar no punto onde se iniciou e volvín para documentar todo desde o primeiro momento, de igual xeito que agora rexistro a reconstrución. A complexidade neste caso non reside só na parte técnica, senón no sentimento de impotencia».

A través desta mostra preséntanse as conmovedoras instantáneas dos momentos iniciais, nun percorrido temporal que chega ata a colaboración indispensable das persoas voluntarias e a emotiva evacuación da poboación, e finaliza cun apartado dedicado á espectacular beleza natural dunha illa que, non en van, se alcuma La Isla Bonita, coa espectacularidade das súas paisaxes e a riqueza do seu ceo nocturno, polo que se converteu na primeira no mundo en obter a certificación como Reserva Starlight da UNESCO. Un apartado que lembra que sempre hai un camiño para refacernos, sexa cal sexa o noso volcán particular.

A análise da erupción en Cumbre Vieja complétase cun módulo de divulgación técnica, con información confeccionada en colaboración co Instituto Xeográfico Nacional e cunha sección onde nos achegaremos á outra cara do volcán, con aspectos menos coñecidos sobre as contornas volcánicas.

O obxectivo da proposta expositiva é ofrecer diferentes lecturas e niveis para que o público se poida aproximar á erupción dun volcán desde múltiples perspectivas: unha ollada documental a través das fotografías, unha mirada histórica a través do relato de realidade virtual, un achegamento científico-técnico a través dos módulos desenvolvidos en colaboración co Instituto Xeográfico Nacional, unha lectura en clave social que se fai evidente cos testemuños presentes na sala, unha ollada emocional a través da reflexión psicolóxica de Belén Colomina e finalmente unha proposta impactante e poética pola propia intensidade e sensibilidade das imaxes.

REALIDADE VIRTUAL

A exposición ofrece unha impactante actividade de Realidade Virtual. A través dunhas lentes de última xeración o ou a visitante poderá vivir en primeira persoa a impresionante erupción dun volcán, sentir o impacto do estrondo, a inquietude que conleva; pero tamén entender que o drama é tamén axente de cambio, motor de creación e porta para novos escenarios e nova vida. Unha experiencia impactante e estarrecedora que nos falará das leccións que podemos aprender da natureza e os seus tempos.

É a primeira vez que se leva un escaneado completo da coada e o cráter do volcán da Palma a unha experiencia con dispositivos de realidade virtual estereoscópica. E para iso realizáronse máis de 10.000 fotografías desde un dron de última xeración para lograr o escaneado completo. Trátase dun escaneado fotogramétrico (5 cm de erro) mesturado con simulación dixital de fume e lava incandescente para lograr unha sensación de inmersión total no fenómeno.

Nesta experiencia de realidade virtual, o ou a espectadora poderá voar sobre o volcán e ver toda a devastación provocada, mediante un voo desde a costa ata o cráter. Comeza desde o interior dunha casa humilde dunha familia de agricultores, horas antes de que a acabe engulindo o volcán de San Juan, no ano 49, e conta a historia de varias xeracións de agricultores sobrepoñéndose á devastación dos diferentes volcáns: un avó que o perdeu todo na catástrofe de San Juan no 49 e o seu fillo que, 72 anos despois, volve perder as súas terras por mor do volcán de Cumbre Vieja. Trátase dunha alegoría que achega unha mirada resiliente á destrución que xeraron os volcáns na illa da Palma, centrándose na súa capacidade para facer abrollar de novo a vida, e un canto ao espírito de superación do ser humano fronte á adversidade.

Carlos Seijo, creador do módulo de realidade virtual, subliña que esta é unha experiencia pioneira. Un proxecto desenvolvido polo noso equipo de Afundación para esta exposición.

A montaxe da mostra sorprende coa recreación dun espazo no que soa de maneira constante o auténtico ruxido do volcán de Cumbre Vieja e o laranxa da lava asolaga o espazo, nun xogo de sensacións extraordinario.

A exposición xorde da colaboración de Afundación coa Editorial Planeta, dinamizadora da publicación Más fuertes que el volcán, da que se conseguiron fondos destinados integramente á xente damnificada polo volcán de Cumbre Vieja.

 
PROXECTO SOCIAL
Sensibilizar a cidadanía e apoiar as persoas que se viron afectadas pola erupción do volcán Cumbre Vieja son as intencións deste proxecto. Neste contexto, ABANCA promoveu unha campaña entre os seus clientes e persoal para recadar fondos para a xente damnificada que reuniu 50.000 euros, entregados ao Cabido Insular da Palma. Ademais, a programación de Viaxes +60 promovida desde a Área de Envellecemento Activo de Afundación incluíu entre as súas propostas unha viaxe á illa da Palma en marzo, co obxectivo de contribuír á dinamización da economía local e á recuperación da actividade turística.

ACTIVIDADES EDUCATIVAS

INFANTIL A 3º PRIMARIA | VISITA CREATIVA | «Un dragón durmido que cuspe lume e non deixa de roncar»

4º PRIMARIA A 2º ESO | VISITA CREATIVA | «Drons a 1.000 graos. Viaxe ao centro dun volcán»

3º E 4º ESO, BACHARELATO, C.F. | VISITA COMENTADA | «O volcán de La Palma»

2 €/ ESCOLAR

Información e reservas en areaeducativaourense@afundacion.org.