Figura alegórica

Comentarios

A obra de Buciños complétase con seis figuras, en granito, de tamaño monumental, colocadas na parte superior da fachada principal do Centro Cultural Caixavigo.
As figuras, simbólicas, cubertas con túnicas que ocultan a súa anatomía, impoñen os seus volumes ó vento cun lixeiro pulo cara adiante, como se fosen os mascaróns dun gran barco.
As súas vestiduras, ríxidas, anímanse con dobreces que nunhas se prolongan por detrás dos seus corpos, formando círculos ocos por onde penetra a luz e mailo aire, e noutras remontan as cabezas con movemento impetuoso, estremecendo a pedra con arestas, ondulacións e mais enrugamentos en abano, como se se tratase dun fondo de ambientación pictórica do que destacarse as figuras como altorelevos.
A abstracción, a figuración e mailo neoexpresionismo conviven nestas esculturas, sen prexuízo de reflecti-la súa forte personalidade, dinamizada pola exposición ó aire libre que as somete a luces cambiantes que regulan o contorno dunha arte sen límites.
A valoración do volume, a limpeza e maila tersura do traballo sobre a superficie do material así como a exquisita sensibilidade de cada plano son notas destacables destas figuras, representación plástica de A Pintura, A Música, A Literatura, O Teatro, A Escultura e O Cine, actividades culturais que se desenvolven neste edificio.

M. L. I. J.

Reproducciones

"Colección Caixavigo. Pintura-Escultura-Dibujo". Tomo 3, páxina 30.