ÁNXELA

Comentarios

Esta instantánea reproduce un dos temas máis íntimos pertencentes á produción de Vari Caramés na que fotografa a súa filla Anxela. Non sempre as persoas son obxectivo da súa obra, de feito o ser humano é un dos protagonistas menos fotografados polo artista, polo que aínda dá maior relevancia a esta imaxe tan persoal.

A auga e os efectos que a luz produce nela son un tema recorrente nas fotografías de Caramés, tanto en piscinas coma no mar, a auga da choiva, en cor ou en branco e negro, inmortalizando tanto barcos afundidos e restos de naufraxios que permanecen inmóbiles durante séculos baixo o mar coma o movemento efémero das persoas nadando nun segundo preciso... Neste caso unha imaxe subacuática na que os efectos da auga se conxugan coa luz verdosa, combinado co característico desenfoque de Vari Caramés, facendo que a propia figura quede difuminada pero á vez represente o movemento lento baixo a auga.