SIN TÍTULO

Comentarios

Esta obra de Pailòs, destacada figura da corrente Torresgarciana, caracterízase polo seu carácter xeométrico, construtivista e barroco.

Construída a xeito de crebacabezas, vai compoñendo o espazo onde insire elementos da grafía xeroglífica, na que mestura a xeometría coa arte autóctona das culturas de América Latina. Unha forte influencia do mundo precolombino déixase ver nesta obra, na que os elementos da natureza e os diferentes símbolos da súa cultura se repiten reiteradamente ao longo de todo o cadro. Un conxunto de signos e figuras que poderían representar palabras e expresar un xogo de enxeño, semellando unha adiviña que debemos descubrir para achegarnos a un lugar afastado.

As bandas horizontais que compoñen o cadro actúan como fío condutor ata o peche definitivo da obra, onde cabe destacar o barco como corazón da peza que sostén, dá forza e equilibra.

Sensibilidade cromática nun intenso despregamento de cores de fortes contrastes, no que destacan os vermellos, azuis, terras e negros.

Unha obra plástica a pesar da súa aparente elementalidade, onde teñen cabida a razón e a reflexión ao mesmo tempo que os sentimentos.