Comentarios
En primeiro termo, á esquerda, atópase unha parella de mozos sentados sobre a area debaixo dun toldo. El, tocando a frauta, ela, cunha flor na man; no centro, unha muller espida, de costas, co brazo apoiado no fuste dunha columna, un pano na man e una lira ós seus pés; á dereita, unha moza sentada sobre unha barca cun libro na man; ó fondo, temos unha perspectiva de casas escalonadas, á beira do mar, co perfil característico da cidade viguesa. A Música, A Arte, O Teatro, o pintor como Giorgone, no seu "Concierto", agocha o significado da composicón combinando un pudoroso nu con figuras vestidas, articuladas, con diferentes motivos, en posturas contrapostas, no ámbito escénico dunha praia, con grande dominio da composición. O debuxo, rigoroso, perfila as formas, modelándoas con sombras discretas que subliñan os volumes. O conxunto é dun grande efecto artístico, pola súa monumentalidade e excelente execución, con dominio de ocres que xogan con marróns, verdes, negros, vermellos e brancos.
