NIÑA EN GRANJA

Comentarios

Atopámonos ante unha escena costumista onde o motivo protagonista ao que fai referencia o título é realmente un pretexto para a realización dunha paisaxe.

Acorde coa época na que foi realizado, Teodomiro Avendaño presenta un evidente academicismo nesta acuarela, cun debuxo coidado e unha pincelada preta e precisa.  Así mesmo, a composición está estudada, cunha asimetría que nos propón a maior carga de elementos na esquerda da pintura, pero que se ve equilibrada grazas á nena en primeiro termo e o cabalo de fondo na dereita. Márcase a profundidade a través do muro que divide a acuarela en sentido diagonal e que, ao mesmo tempo, traza unha liña de fuga cara á dereita que terminaría fóra da propia composición. Avendaño distribúe distintos “obstáculos” como recurso para que a mirada do espectador non recorra o cadro dunha ollada e termine no horizonte: ovellas, nena, muro, casas e árbores fan que a nosa vista quede no centro da pintura e evite o fondo perdido.