PEIXEIRAS
- INV:
- 3405
- Año de creación:
- 1969
- Dimensiones:
- 69 x 98 x 0
- Técnica:
- Pastel sobre papel
Comentarios
O mar, a muller, a vida cotiá adquiren, en Manuel Torres, a condición de materia de observación e fonte de aprendizaxe.A peza, premiada coa medalla de prata na I Bienal de Pontevedra do ano 1969, presenta a dúas figuras femininas, grandes e monumentais coma efixies totémicas da muller do mar, ensimesmadas limpando peixe, realizando metodicamente o seu deber diario. Son imaxes impersoais, sen rostros, metáforas do traballo.
O debuxo moi xeometrizado, con referencias neocubistas, reforza a concepción hierática e escultórica das peixeiras ó remarcar, mediante trazo seguro, os contornos con grosas liñas negras que non dubidan, que describen formas esenciais sen eliminar o suave modelado nos corpos.
Opta abertamente pola monocromía, polos tons terra, ocre, sanguina, branco e negro, aínda que, dende este ano, introduce o cromatismo nos pasteis. As luces e as sombras interprétanse mediante o sombreado de certas zonas, permitindo que respire o papel para transmitir a sensación de luz, a sinuosa carnosidade das figuras que se fonden nun espazo envolvente, nun contexto pleno de identidade e de sal.