FACHADA DE SANTA MARÍA
- INV:
- 3348
- Año de creación:
- 1983
- Dimensiones:
- 89 x 62 x 0
- Técnica:
- Acrílico sobre lenzo/táblex
Comentarios
A capacidade para retratar fachadas e edificios históricos de iconografía complexa como a igrexa renacentista de Santa María de Pontevedra reflicte a esmerada técnica do artista, a habilidade e curiosidade da súa mirada.
O seu traballo capta a trama estrutural e a calidade plástica da portada mediante unha interpretación arriscada pero efectiva, que consiste en presentar a obra nun único ton, nun cobreado aplicado directamente sobre o fondo cru do lenzo, outorgándolle á peza o aspecto dun bocexo, dun debuxo realizado con sanguina.
O autor fixa os perfís, encaixa perfectamente cada elemento, e cada detalle iconográfico é recoñecible. As variacións lumínicas, que reforzan a sensación de volume, descríbense mediante un tostado diluído, menos intenso, que discorre polos paramentos reforzando os ángulos, recollendo os matices da pedra e as sombras proxectadas pola rica ornamentación escultórica.
O aspecto final, de grande atractivo visual, rememora as trazas arquitectónicas de fábricas renacentistas, ou barrocas, nunha desinteresada homenaxe ós vellos mestres de obra. A fuxida da reprodución fidedigna achega unha perspectiva diferente, un enfoque cargado de arte e de historia.