Comentarios
A posición da figura feminina, que amosa o lombo espido, nunha actitude coqueta e seductora, remite de inmediato ó mundo atrevido e desinhibido do París, captado por Toulouse- Lautrec, ás bailarinas do Moulin Rouge que, como Goulue, foron retratadas en innumerables ocasións polo pintor.
O rostro serio da muller revela seguridade en si mesma, a consciencia e o convencemento do seu poder sobre o espectador. A selección cromática, intensa, case rechamante, incide na personalidade da personaxe, na impresión de liberdade, de incitación e de vida alegre.
A pincelada impresionista adquire un valor fundamental e convertése nun elemento compositivo, discorrendo polo lenzo para xerar diferentes texturas que acompañan as feridas provocadas polos chorros e os goteos de pigmento. Os trazos varridos van conformando unha atmosfera envolvente e pesada, dominada por violetas, verdes, amarelos, laranxas, que somerxen a imaxe nun ambiente cargado de cheiros e sensacións evocadoras de tabaco, suor, sopor e desexo.
EXPOSICIÓNS:
"Fernando Quesada". Xuño de 2002. Club Financiero, Vigo.
