Comentarios
A cidade francesa, situada na desembocadura do río Sena, serve de escusa para que Rafael Alonso retome o tema das mariñas, da auga e do mar.
A paisaxe, limitada por un encadre vertical, amosa a desembocadura do río nunha zona portuaria, industrial e moderna, propia dunha cidade recén reconstruída tras a súa destrucción na II Guerra Mundial.
A composición estructúrase a partir da liña de horizonte, que relega o río e as súas marxes ó primeiro plano, á vez que presenta unha zona superior libre, sen trazo que violente o branco do papel, xerando un ceo despexado e en calma. O enfoque estreito e longo reforza a concepción vertical das grúas, presentándose unha dualidade entre o límite sinalado polo horizonte e a verticalidade dos equipos industriais.
O trazo é rápido e limpo, definindo as formas mediante as diferentes liñas, raias, puntos que representa, dun modo sinxelo e certeiro, os diferentes elementos que compoñen un escenario onde o home se impón sobre a natureza.
