Comentarios
Sobre un fondo bitonal en azul disponse unha figura feminina de costas, solitaria e allea ó espectador. A muller oculta o seu rostro e os seus cabelos, que están totalmente cubertos. A súas vestiduras, touca e saia, limítanse tamén ós azuis.
A imaxe, realizada mediante planos, podería quedar reducida a unha simple silueta, unha forma case abstracta, pero o volume está plenamente acadado. O cromatismo uniforme, aplicado á espátula con extraordinaria delicadeza e rigor describe a dirección da luz, de esquerda a dereita, pautada polas gradacións tonais de azuis, que lle confiren verismo e rotundidade á imaxe.
A figura humana simboliza a vertente máis social da pintura de Lodeiro e debe ser entendida en clave de compromiso, evidente na austeridade dunha obra que transmite un sentimento case relixioso.
