Comentarios
A fonte sobresae en primeiro termo sobre un fondo de xardín. Describe a vexetación e arquitectura deste fragmento do parque, captando o ambiente. Con grande sensibilidade combina os contornos do debuxo cos fondos baleiros que reteñen a luz. O gravado, executado cun debuxo realista, adquire un ton de fantasía ó matizalo con varias tintas, azuis, negras, e un ocre avermellado, coma oxidado, o que lle dá un grande atractivo. Este pictorismo enfatiza a estampa ofrecéndolle o acento poético dun lugar para reter na lembranza.
