JOSÉ FRANCISCO

A súa vida está completamente vencellada á cidade herculina, na que gozou de considerable fama e exerceu actividades comerciais que simultaneou coa pintura, a súa verdadeira vocación. Comezou a expoñer en 1946 e desde entón organizou mostras nas principais cidades de Galicia e noutras moitas de España. Participou nos Salóns de Outono. En 1962 obtivo o premio especial de paisaxe no certame organizado pola Deputación provincial, galardón que, acompañado de medalla, repite ó ano seguinte. Está representado nos museos da Coruña e Lugo, entre outros, así como en coleccións institucionais. José Francisco, pois co seu nome unicamente asinaba as súas obras, é fundamentalmente paisaxista que segue os modos do impresionismo tradicional e ten concomitancias, por outra parte case obrigadas, con artistas coruñeses como Francisco Lloréns e Manuel Abelenda. Pintura amable, sen estridencias, de ámbitos galegos do campo ou das rías altas, con mancha solta e boa base de debuxo, desde unha paleta rica e moi grata en verdes, carmíns e grises.