GUMERSINDO PARDO REGUERA

Inicialmente, o seu mundo foi moi distinto do plástico, xa que cursou a carreira de Farmacia na Universidade de Santiago, chegando a ser catedrático de Química na de Granada, tarefa que abandonou para retornar á Coruña onde foi profesor de Física na Escola de Artes Industriais e de Química Popular na de Belas Artes da mesma cidade. A súa afección á arte foi, pese a esta actividade, moi intensa. Participou na Exposición Nacional de Belas Artes en 1895, e na de 1904 logrou mención honorífica. Excelente retratista, de corte moi realista, comparteu esta actividade na Coruña co seu coetáneo Román Navarro. No paisaxismo emparéntase cos modos do astur-galaico Dionisio Fierros. Sen ser un artista excepcional, gozou de renome e prestixio, xa que foi nomeado membro de número da Real Academia de Belas Artes do Rosario, na Coruña, e correspondente da de San Fernando, en Madrid. Conservan obra súa diferentes institucións oficiais, en especial, a Deputación da Coruña, que garda un retrato do rei Alfonso XIII, moi novo, que Pardo Reguera realizou por encargo. Tamén ten obra súa o Museo de Lugo.