SANTIAGO MONTES

Case por completo autodidacta, traballa en Vigo, onde imparte clases de pintura. Iniciouse no postimpresionismo con paisaxes e bodegóns de adscrición case ortodoxa á dita tendencia. Durante anos viaxou por Europa, residindo longas tempadas en Alemaña. En Heildelberg realizou unha serie de debuxos, de liña romántica, que estendeu a Nüremberg e a outras cidades. En Vigo realizou outro álbum que publicou con éxito. A súa pintura evolucionou cara a modos informalistas nos que milita actualmente. Montes é un temperamento moi sensible, de vea lírica e intimista. Magnífico debuxante, voluntarioso para o exercicio formal da pintura, as súas composicións non figurativas teñen vigor, estructura e un cromatismo quente e moi ben harmonizado. Artista pouco ruidoso, as súas exposicións distáncianse, se ben cando as realiza, coma en Madrid en 1991, sorprende pola súa calidade e polo seu bo facer. Está representado no Museo de Vigo, no de Pontevedra e noutros de provincias españolas. O valor documental dos seus debuxos, feitos a lapis brando, sen dúbida ningunha de extraordinario interese, non lles resta beleza, polo contrario, emparéntaos, e el ben sábeo, cos grandes debuxantes do Romanticismo, en concreto con Urrabieta Vierge, a quen admira.