CAYETANO LLEDÓ

Aínda que non se dedicou profesionalmente á pintura, as súas constantes exposicións e maila calidade da súa obra invitan a considera-lo seu nome na nómina da plástica actual de Galicia. Acuarelista, case exclusivamente, a súa mancha é ampla, solta, baseada nun debuxo doado. Interésalle fundamentalmente a paisaxe e, en concreto, os temas do mar, que leva á súa obra cunha peculiar lixeireza. Celebrou mostras en Vigo e mais en numerosas cidades de Galicia e de España. Participou en certames contados, aínda que sempre destacou. Non está vinculado a grupos nin a escolas. Pola contra, solitario, sitúase ante a natureza e capta impresións de intención vagamente impresionista, cunha mancha fácil e solta. Está representado en coleccións institucionais e particulares de Galicia. Participou na última das mostras do Centenario de Caixavigo, en 1980, conxunto de exposicións que abrangueron a totalidade da plástica do país.