ANDRÉS COLOMBO

A súa nenez transcorre na súa vila natal e en Pontevedra, onde cursa estudios de bacharelato. Inicialmente traballou como empregado de banca. A causa da súa decidida actividade política méteno no cárcere en Santiago, en 1934. Liberado moi axiña, trasládase a Madrid e posteriormente exíliase en Francia. Estivo vinculado a xoves artistas que despois habían de acadar renome coma os irmáns Eugenio e Mario Fernández Granell, Cándido Fernández Mazas e o escritor Eugenio Carré. Os anos da contenda civil e os de posguerra cortan a súa carreira de debuxante que retoma a mediados da década dos sesenta. Realizou exposicións fóra de Galicia, para retornar á súa terra natal e amosa-la súa obra na Coruña e Santiago; posteriormente en Holanda, Nova York, Chicago e diversas cidades dos Estados Unidos. Calificárono de expresionista e surrealista. Cultivou o debuxo preciso, exquisito de execución, en ideacións que o emparentan con modos orientais. Ocasionalmente traballou o gouache, aínda que sempre con deliberadas limitacións no cromatismo, que queda reducido ó gris, branco e negro. É moi escasamente coñecido en Galicia, onde os museos carecen de obra súa. Só figura nos de Lugo e Sada, A Coruña.