JUAN GARCÉS

Mariño de profesión, entregoulle á pintura arelas suficientes como para consideralo un artista profesional. Dedicado fundamentalmente á paisaxe non se adoita incluílo en repertorios galegos, malia o seu necemento. Realizou numerosas exposicións dende moi novo, sobre todo de paisaxes e mariñas, que lle interesaron á crítica, obtendo gabanzas desde o mestre José Camón a Antonio Manuel Campoy. Existen obras súas en museos de Galicia, e en concreto no de Pontevedra.

Garcés é un lírico esquemático, con grande dominio das gammas envoltas, sobre todo de azuis e grises. As súas mariñas son exquisitas, froito dunha longa observación do espectáculo natural que para el é o mar. Nos ámbitos de terra dános grandes extensións, dalgunha maneira identificables con José Beulas, para que a materia, encol dun debuxo escueto e seguro, diga a emoción da natureza espida de terras pardas ou amarelas, en contraste con zonas de intensa sombra.