ANTONIO ABAD

Antonio Abad formase entre 1979 e 1980 na Escola de Artes e Oficios de Vigo, onde se especializa nos estudos de de Debuxo Artístico. Desde a súa infancia mostra unha forte inclinación cara ás artes plásticas, manifestando unha personalidade inquieta e introspectiva. Interesado pola lectura, o debuxo e a contemplación artística foi ampliando de xeito autodidacta a súa formación. A partir de 1990 inicia a súa actividade expositiva individual, desenvolvendo unha traxectoria ascendente e continuada, participando en salóns internacionais de arte en Francia, Italia e Estados Unidos. En 1993 organiza diversas exposicións colectivas polo norte de Portugal, e en 1994, crea o seu propio estudo-taller, espazo no que combina a creación artística coa docencia. 

Paralelamente á súa actividade pictórica, Antonio Abad desenvolve unha importante presenza no ámbito cultural como membro de varias asociacións artísticas, colaborador de revistas especializadas ou xurado en concursos de pintura. A súa obra é recoñecida en numerosos certames e salóns internacionais. En 1998 recibiu en Francia a Mención de Honra en Natureza Morta (Mention Natura Morte) e en 1999 gañou o Primeiro Premio de Técnica Pastel no III Salón Internacional d’Arts Plastiques celebrado en Barcelona, alén do Diploma di Mérito no VII Trofeo Remo Brindisi de Ferrara (Italia). A principios do novo milenio participa nunha mostra colectiva de doce pintores españois en New York, obtendo unha notable aceptación crítica.

Antonio Abad domina técnicas como o óleo e a acuarela, con todo, progresivamente orientou produción para especializarse no pastel, técnica na que se asinta a súa identidade e pola que é plenamente recoñecido. A decisión de centrarse neste medio xorde do seu interese por reivindicar unha práctica artística pouco frecuente no contexto artístico galego. Nas súas investigacións utiliza de xeito simultáneo o óleo e o pastel en soportes rugosos, explorando as posibilidades expresivas da materia e a súa textura. Deste xeito, a súa produción artística alberga varios xéneros como o bodegón, a paisaxe, a mariña ou o retrato. A súa obra parte de referencias impresionistas, onde introduce sutís composicións abstractas, que non rompen a unidade visual da obra. Estas combinacións, permiten ás obras de Antonio Abad obter unha gran riqueza táctil e cromática, onde os pigmentos parecen vibrar. Sensación que se amplifica co tratamento da luz de carácter ambiental.